BINTANGOR: Direktor Besai Feri Sungai Sian, Bintangor, James Wong kemari bisi datai ngabas Kelinik Bintangor pengudah ke suah ninga sebana mensia mayuh ditu betapi enggau penanggul suntuk palan endur paking kerita maya ngelawa kelinik nya.
Ketegal ke enda chukup alai paking, mensia mayuh nadai chara bukai kelimpah ari paking kerita sida ba sebelah tisi jalai.
Penatai Wong ngagai kelinik nya bepun ari iya ke suah ninga mensia mayuh lebih agi rayat di Bintangor empu sebanaka penanggul nya.
Berindik ari pekara tu mega sehari tu (19 Oktober), iya deka ngatur aum begulai enggau Sekretari Politik Kepala Menteri sereta bala tuai raban bansa ba menua nya di Opis Pelilih Meradong, pukul 10 pagi.
“Kami mega deka berandauka pekara bukai baka penanggul ba sistem entali ai, jalai, atur pengawa ngumpul uras enggau pekara ke bukai ti bekaul enggau pemansang di Bintangor.
“Aum kami tu mega bisi disempulang enggau pengawa berandauka pemansang penatai pemisi rayat di Bintangor,” pia ku iya madah ngagai pengarang berita.