KUCHING: Opis Kereja Raya Sarawak (JKR) deka nentuka jalai Bakun nuju Murum enda putus pengudah sekeda jalai ba KM 28 tusur kena malam Hari Dua tu tadi.
Menteri Kereja Raya Dato Sri Fadillah Yusuf madah nitihka penerang ari Direktor JKR Sarawak,ejensi nya enggau naka ulih mutarka penanggul ngambika jalai mengkang ulih ditengah mensia mayuh.
‘Diatu JKR Sarawak udah nemu pekara ke nyadi lalu sida udah bejalaika pengawa mutarka penanggul nya.
“Pengawa nyengkaum ngemesai lurung ke tusur ngambika ulih ditengah sementara.
“Meseti bisi seiti lurung lalu sida udah bejalaika pengawa, nitihka ripot Direktor JKR Sarawak lebuh ke dikerandau aku,’ku iya.
Fadillah mansutka jaku tu ngagai pengarang berita pengudah nyadi chairman Aum Ekonomi Bumiputera (MEB)Sarawak ke diatur di sebuah hotel ditu, kemari.
Ba penusah ke nyadi,Opis Polis Pelilih Mit Belaga bisi nerima ripot ke alai setengah ari jalai ba KM28 bisi tusur lalu ditutup.
Jalai nya nyendia penyambung Bakun/Belaga ngagai Palan Tekat Ai Murum iya nya urung 200 KM ari Bintulu.