KUCHING: Opis Pengerara Api enggau Penyah Penusah Malaysia Negeri Sarawak (JBPMNS) tetap ngadang taja pan penusah ampuh bah di nengeri tu dipelabaka nadai nyadi.
Direktor JBPMNS, Nor Hisham Mohammad madah, taja pan kandang endur Sarawak Barat betapi enggau ujan bangat ti dipelabaka nyadi nyentu Hari Lima tu tadi, tang Bomba tetap ngadang dalam semua pekara nyengkaum anggota sereta kereban penyelamat.
“Naka ke diatu raban Bomba tetap ngadang, nyema bisi penasah nyadi kami ulih meri respon tumu.
“Ensanus kami bisi beratika gaya enggau unit langit Bomba dikena ngenukuka dua bilun engkabang kami besedia meri servis.
“Raban kami di serata nengeri udah besedia napi ampuh bah, kelimpah ari bisi 52 buah bot Bomba lalu apin lama udah kami bisi nerima sereta ngagihka lima buah 4WD enggau lapan buah lori dikena napi enggau sebarang penasah di serata Sarawak, ukai semina maya ampuh bah aja,” ku iya.
Iya mansutka penerang nya lebuh dikerandau raban pengarang berita pengudah ngulu aum Komiti Penusah Ngenyit Nengeri ungkup kandang menua Kuching, ba Wisma Bapa Malaysia ditu, ensanus.
Nitihku iya, di Sarawak bisi 1100 iku raban Bomba nyengkaum urung 900 iku ti bejalaika operasyen di Balai sereta urung 200 iku ba bagi pengatur pengawa.
“Nyema bisi insiden kami deka ngambi sida ba bagi pengatur pengawa sama enggau bejalaika operasyen.
“Lalu sekumbang musim pengujan tu semina 20 peratus aja raban dikemendar ngambi kemisi.
“Kami deka beratika pekara tu, nyema nyentuk 23 Disember gaya hari udah manah dipelaba peratus ke ulih kemisi deka ditambah, dikena meri awak ngagai raban nya nyendiaka diri ngintu pengerami (Krismas),” ku iya.